今日是全國哀悼日嘅第三日,亦係最後一日!回想前日時,亦即係全國哀悼日嘅第一日,於這天的下午一點半,我班應該係上緊商務文書處理課,班主任戴太一上課就講,今日唔使用電腦,我都唔明點解,仲手慣按了主機開機掣,再到系統到有得關機嘅程序先有機會將電腦關上,由一點半到一點五十五分,戴太所講全部都係打速成嘅理論內容。講完之後,佢先同我哋全班同學講,學校嚮應全國哀悼日,學校有喺禮堂有默哀儀式,因此我哋全班後半段嘅課完全唔使上,兩點鍾準時到達學校禮堂就得喇!

    到達地下學校禮堂後,有好多上緊唔同程度課程嘅同學仔己經嚟到禮堂門口附近等候進入,學校署理講師林太見我哋咁有心同埋咁有誠意,即刻叫哂有心參加是次默哀儀式嘅同學仔入嚟裡面有秩序咁樣企好,五分鐘之後,全部有心嚟參與是次活動嘅同學仔都全部入哂去後,成個禮堂好似去咗黑市賭場咁嘈!我班有Ｄ契弟夠膽死帶CAP帽入去,大佬,依家全國所有人都嚴肅對待呢件事,你仲可以以玩玩吓嘅心態嚟對待!到咗默哀嘅時候,更有一條企喺我後面嘅仆街,用幾隻手指隊咗我背脊幾下,因我低頭默哀見唔到佢個樣,否則我將佢雙手擰斷!

    默哀完結之後,自己覺得好唔開心,始終自己班裡面都有一D衰人以玩玩吓嘅心態去對待此事,默哀前班裡有個叫梁X璋嘅死契弟夠膽死講叫我做吓戲,我聽到後己經一把火燒到心口度啦,好彩呢度係學校,唔係喺條街度,唔係我炳你十世!其實唔使我流眼淚,都有學校嘅唔少老師同文員亞姐眞情流露啦!儀式完咗後,學校有捐款,我捐咗$20.5蚊!可惜我個心好難受兼好沉重!我覺得我國四川大地震而死去嘅同胞受到呢種完全無一點憐恤之心嘅泠血之徒所輕視簡直死都死得唔眼閉!

    最後我校所有同學為四川大地震嘅災民共籌得八千六百多元港元善款,此筆款項將全數捐給香港紅十字會,我衷心希望我哋所有同學的少許幫忙能協助災區人民!并且希望在以後嘅歲月,災難從此離開中國!祝福中國!祝福四川!

    星期五上午由九點半開始,上咗不到一個半鍾頭嘅商業軟件應用課就因於早上十一點半開始在學校禮堂嘅中專課程下學期頒獎典禮,今次班裡一共有十二位同學領獎,可惜比上次的少!然而我本人,如果唔係因為上學期有一件打架事件要收一封嚴重警告信嘅話,上學期我也可以攞獎了!今次我可以有份領獎係我個人意料之內,根本唔會有一D驚喜!可惜班上有一D立心不良嘅同學喺今日都做中傷我嘅事,不過都係由佢把死人口講出嚟,今日我心情特別靚,因此都唔同佢有所計較!我繼續坐住喺度等待頒獎禮開始!

    我喺亞SIR再次派位嘅時候,因為有Ｄ出錯,要重新排位,佢最後坐第二行第三個位,我則坐第三行第九個位,我同果條仆街隔咗有一行位,我終於有一陣耳根清靜,一直等到頒獎典禮開始!好快見到戴太上台做司儀,時間已是十一時三十七分,喺佢後面係彭院長以及學校署理首席講師林太,戴太然後請院長致詞,院長花咗大約十五分鍾講完佢嘅講話後,隨即為修讀中專課程嘅三個班別嘅獲獎同學頒了獎,再到學校署理首席講師林太上嚟頒獎,佢又為五個班別嘅獲獎同學頒了獎,唉!我睇頒獎情節都睇到傻,再到有一段八分鍾嘅短片播出,內容係有D修讀兩年制中專證書嘅同學去接受一個海事訓練嘅課程。

    影片播放完後,頒獎隨即繼續開始。再到學校語文中心高級講師陳SIR為三個修讀中專課程嘅班別頒獎,最後才到數學及電子計算系高級講師張太為最後一批應該得獎嘅班別頒獎,我嘅班級係最後上臺攞獎果一班,可惜我個人并不是太鍾意!總覺得有種酸溜溜嘅感覺!到咗最後一個應該上臺攞獎嘅班級攞完獎後,好彩我班只係排尾三上臺,唔係最尾上臺,否則我班全部有份攞獎嘅同學仔肯定會係全校最受注目嘅一群!頒獎禮完結後,有一個表演環節,有一個被老師公認為唱歌唱得好好聽嘅同學,被點名出嚟表演即場唱一首英文歌,歌名叫<You are beautiful>!可惜佢調音和較位做得唔好,唱完之後好少人拍掌!

    我希望自己能夠喺學院結業禮內都有獎攞,那怕只得一張獎狀,咁樣都能有助我成功獲得一個基礎文憑學位!

     學院於復活節公眾假期前兩日己當作學校假期一早就俾所有同學放哂假喇,我喺第一日學校假期時,即刻喺當日上午八時從彩虹邨家中出發,到彩虹港鐵站乘搭鐵路到九龍灣港鐵站,再步行到職訓局九龍灣訓練中心綜合大樓內。青年學院(九龍灣)也在這建築物之內,但只佔地下、一樓及二樓,我為免夜長夢多,拖得太耐時間又怕唔記得,咁樣我襯中專證書專修班嘅上學期成績表正副本,連埋一張填好咗一大半嘅中專文憑精修課程申請表嚟呢間學校遞表兼順便參觀一下!

     其實都可以由現時就讀的蘇屋青年學院代勞,但我見負責是次課程接受申請處理的學校距離我屋企又咁近,一於由自已搞掂,唔需勞煩學校喇!最衰自己又無本事,於正規會考課程又升唔上,搞到學歷方面又唔識點樣填!我好辛苦咁由九龍灣港鐵站一邊問人一邊流哂汗咁樣步行,經過牛頭角警署,去到大樓地下更俾保安亞姐循例盤問一番先可以到旁邊嘅地下辦事處訊問報讀中專文憑精修課程嘅細節,點知解答我填寫申請表問題嘅文員哥哥又唔知點樣填,叫我行路上一樓問青年學院(九龍灣)負責收表嘅老師!我個人對於佢回答我問題嘅反應加上態度只有無奈兩字!

     當我正想上去那時,守門口嘅保安亞姐同我講,佢話:「後生仔,果幢大樓鬼咁大,行樓梯行上去你到唔知轉左定轉右呀,一於搭升降機啦!」佢講完之後,我應番佢一句:「哦!唔該!」果時我又有見有升降機落到地下,我喺出面等裡面嘅人走哂後,我就同幾個中年亞叔入去搭升降機!入到去後人人都爭住按掣,我見有人幫我按了一樓,我就唔插手啦!當升降機到一樓,有個亞叔同我一齊走出升降機,我則在門口站着,而佢向前走去另一個地方。升降機門口嘅正面己是青年學院(九龍灣)嘅學院秘書處,這個地方就是我繳交中專文憑精修課程申請表嘅正確地點,一點亦無錯!

    我行到學院秘書處門口,用頭向前望望,裡面嘅職員全部喺度專心做緊自已嘅工作,好似完全察覺唔到我嘅存在。我睇睇有無一D聯絡設施呼喚佢哋其中一位職員出嚟,好彩門口前面都有一個門鈴,我對住門鈴一按,門鈴發出鈴聲,裡面嘅其中一位職員就出咗嚟!佢一嚟到門口外面就開口問我有何貴幹,我就應佢我嚟呢度係交表嘅!佢答番我話好,將我份表交俾佢。但我同佢講,我有一D地方唔識點填,佢話俾佢睇吓!佢睇完後,問我有無中五學歷,我答佢我本身就係一個青年學院嘅學生,我所讀嘅中專證書專修班商業班係完成後己有中五學歷,可以報讀呢個課程咖啦!

    佢又表示佢明白并且知道喎,咁我就即時向佢請教我嘅申請表未填完嘅部份應該點樣去填,我話我自己未讀過中五級嘅會考課程,更未考過會考喎,我最勁都係去到中四,你叫我點樣填呢?佢話我可以將由中幾讀到中幾以及會考中、英、數三科成績全部用筆刪除佢,既然我係青年學院嘅學生,佢就有方法循住內部成績查核系統查番我嘅全個學年嘅所有科目嘅成績!佢再問我有無喺學校參加過邊D課外活動,有無喺學校攞過一D獎狀等等,我全部都話無!佢話唔緊要,再講依家日子都算早,而且下學期都未完成,如果我有乜嘢額外資料要補充嘅話可以喺到咗面試日期嘅時候再作補充都未遲!佢再睇睇我喺選科意願,睇過無問題後就叫我攞出我嘅成績表正副本俾佢查閱及審核!

    到咗審核成績表環節,我只能夠攞我讀咗一個學期嘅中專證書考試成績表俾佢睇,副本當然附送埋啦!佢將我嘅上學期成績表正副本好仔細咁樣比對,直至確保成績表正副本都絲毫無任何錯誤或不妥嘅地方先收貨!佢收咗我嘅成績表副本,將果份文件疊喺申請表嘅後面之後,再將成績表正本俾番我,仲叫我妥善保管好!我將我嘅成績表收好喺一個文件夾後,佢話報名手續己經完成啦,我可以離開青年學院(九龍灣)啦!可惜我仲未知課程截止報名後,何時先有得面試?佢話俾我聽,獲得面試嘅申請人將個別發信通知,面試日期大約在七月中至八月中左右,叫我仔細一D留意喎!

    佢又話再無其他嘢要問丫嘛,我回番佢己經無啦!佢應番我如果無就我完全可以離開,我好有禮貌地同亞姐講句“拜拜”後,立即轉身離開此地,佢就攞埋我D申請表加上學期成績表副本,走番入學院秘書處裡面做佢自己要做嘅嘢,我企喺一樓升降機門前搭升降機到地下之時,我見到佢將我嘅資料交俾一個小姐,佢再將我嘅資料擺放在一個名稱叫零八年中專文憑精修課程檔案夾果度,等待收齊所有報讀各項分流課程嘅學生再集中處理,我諗眞係要等一排啦!唯有慢慢咁等啦!

    搞掂完所有報名手續後,我見時間尚早,自己都花咗唔少時間去到九龍灣訓練中心綜合大樓,一於參觀一下至走!大樓裡面除咗有幾個技工行業嘅訓練中心外,仲有學徒事務署總署及九龍灣分署,當然青年學院(九龍灣)都設在果幢大樓內啦!不過果間學校設施唔夠青年學院(蘇屋)咁多,我係唔會去果間學校讀書嘅!到咗朝早九點半,都有喺度度過一個半鍾頭,都係夠鍾走人,我就從訓練大樓內附設嘅茶餐廳果度向住門口方向離開青年學院(九龍灣)!我諗我應該再到課程面試日時去多青年學院(九龍灣)一次後,我永遠都唔會再去喇!青年學院(九龍灣),我會耐心的等待着第二次嚟拜訪你嘅機會!

      今日係三月二十日,明天就係紀念主耶穌復活嘅復活節。星期四嘅下午天色灰暗,但我嘅心情并無受到呢刻天色所影響,反而帶住一個充滿希望咁樣嘅心情,帶埋一個裝有面試所需要嘅資料,將佢裝入文件夾再用一個膠袋裝住然後離開彩虹邨屋企,去到彩虹港鐵站搭港鐵到中環港鐵站!我今日下午要去嘅目的地就係中環康樂廣場郵政署總部,正確嘅位置係總部大樓三樓見工!我好彩非常準時喺四點十分嚟到面試地點,因我要喺我嘅面試時間四時二十分之前嘅十分鐘到達此地,我進入大厦地下之後,見到有一個應該未有十八歲嘅女仔啱啱面試完交證走人呢!

     我去到地下保安櫃枱果度,一個保安亞姐問我嚟呢度所為何事!我答佢我己經一早預約咗面試郵政署嘅揀信組助理呢份工,并且指出我個名俾佢睇!佢叫我俾我張身份證俾佢睇睇,核對咗我嘅身份後,即刻俾咗張訪客證俾我,仲提醒我記得面試完後盡快還番嚟,之後叫我去兩部升降機嘅其中一部等到升降機一到大厦即按3字就得!佢咁好心指點我,我當然要對佢講聲多謝,呢D係最基本嘅禮貌!然後攞埋個訪客證轉身走去左邊嘅升降機門口,等咗大約二十秒,升降機嚟到地下,我等裡面嘅人出嚟後,自己就入去!入到去後有五個亞叔跑入嚟,同我一齊搭升降機!

     有四個亞叔同我一齊上三樓,佢哋係郵政署職員,三條友都喺三樓做嘢!我嚟到三樓同佢哋一齊走出升降機,佢哋向左走,我向右走見到有個指示牌豎喺度!內容係:揀信組助理(兼職)向右走,到3x6室面試,指示牌更有向右嘅箭嘴。我見同上次嘅面試地點相同,我知道點行啦!我加快步伐到果個電動鐵閂果度,喺門前嘅拍咭裝置用保安亞姐俾我嘅訪客證向咭機上面一拍,果一段嘟聲告訴我我可以推門進入!我即時推門進入,入到去後,行多幾步就到面試室,面試室由接待室臨時改成嘅!各位可以睇番我上幾篇有關呢間房嘅介紹,今次我唔喺呢篇文章度再一次詳述啦!

     不過我今次去面試嘅時候,房間佈置有些少改變,就係茶几地方唔再係面試接待處,反而將裡面兩間細房嘅其中一間用作面試接待用途,隔離間房先用嚟做面試室!我一入到面試接待室後,有一個都有四十歲嘅文員亞姐坐喺度,好似等待住我咁樣!正所謂入屋叫人入廟拜神,我都好有禮貌地同果個文員亞姐打聲招呼先,之後佢問我係未一早預約咗嚟面試,我答話係!佢問我叫咩嘢名,并且要我喺佢檯面果張點名紙度點返出嚟,我就即刻用我嘅右手點俾佢睇!佢即時剔咗我個名證實我己報到,然後佢叫我將我帶嚟嘅文件放喺佢張檯度俾佢查閱,當然我會好好合作啦!

     可惜一到查閱之時,我先喺佢講出嚟要查嘅四項項目上面,我嘅個人證件相無帶,佢話唔緊要,可以喺郵政署請咗我之後補番都得!之後佢再查我嘅G.F340表格同埋我嘅身份證,問咗一D有關我現時所取得嘅最高學歷同埋我現時有無做嘢嘅問題後,佢見我答得諴實同埋無任何隱瞞,兼準確無確無誤地填寫我嘅G.F340表格,輕易俾我過咗呢一關啦!佢再俾一份查核刑事記錄授權書俾我,叫我填完後再喺下一頁嘅工作地點選擇表去選取一個合適我返工嘅工作地點,今次面試唔同上次,上次只得三個工作地點,今次反而有六個!因此,郵政署批準面試者可以自選工作地點,但係最終嘅工作地方安排會由郵政署根據佢哋嘅實際工作需要而決定,自己完全無得做決定!

     當我差唔多填完两份表格時,果位文員亞姐發現一個重大嘅問題,就係我嘅帶過嚟嘅中四成績表正副本竟然唔相同!我竟然帶咗第一次讀中四時嘅全年成績表副本,而我嘅成績表正本係我第二年重讀中四嘅成績!正副本并不符合,今年眞係認眞大鑊啦!我即時解释自己點解帶錯成績表,同埋想攞番D嘢就走,亞姐見我個樣突然咁狼狽,佢再睇一睇我嘅中四成績表正本,睇到中英文兩科都及格,再話我可以通過審核,不過我要喺郵政署請咗我後,再一次提供我讀咗兩年中四成績表正副本俾部門主管查閱,無帶證件相又要喺通知我返工時帶返,唔係嘅話我連工都唔使返!

     我知道自已可以面試後,當堂鬆咗一口氣!我突然間覺得好急尿,肯定出門之前飲咗太多涼茶,再加上頭先過咗個有關誠信嘅大考驗,心理影響令到膀胱受壓,搞到有自已要即刻去搵厠所去解決!我即刻問亞姐邊度有厠所,亞姐指指我身後,我向後一望,原來有兩條分別去男女厠嘅鎖匙掛喺墙上嘅掛鈎度,我即刻攞咗男厠鎖匙,攞埋帶嚟嘅膠袋,急步行去男厠解決!解決完後,我即刻去洗手盤按水掣洗手又急步趕返面試室,我恐怕面試官已搵我!我回到面試室後,文員亞姐講叫我擺返好條鎖匙再坐底等,我一於照做!等咗大約十分鐘,有一個廿六,七歲嘅女面試官叫我入去!

     果個面試官小姐我認得佢,上次我去面試同一份工時,佢己經係有份做面試工作!三位面試官之中,只有一個面試官我未見過,果個係一個有四十五、六歲嘅亞嬸,佢個名我已唔記得,但我記得佢係做是次面試工作嘅主席面試官,右邊係一個有三十六、七歲嘅亞叔,我都喺上次面試中見過佢,佢同果個亞嬸嘅稱銜都係部門政務秘書,三人之中只得果個姐姐稱銜係郵務員,也係職級最低嘅面試官!但我今次發覺到主席面試官有向我詳細介紹佢自己同其餘兩個面試官,但講得好快,我聽得唔係好清楚,我唯有喺佢介紹完後故意表示明白,免得俾人哋有個唔好嘅印象!

     終於到咗問答階段,跟上次面試所問嘅問題相同!第一條問題:面試職位嘅職責做乜嘢?我根據郵政署官網嘅職位空缺網頁所登出嘅有關呢個職位嘅職責内容講哂出嚟,佢哋聽完後一齊點頭,完全都無講任何補充!第二條問題:你對一間郵政局提供嘅服務認識有多少?我將流動郵政局及普通郵政局所提供嘅所有服務都詳列出嚟!佢哋聽完我講嘅表情係驚奇我對郵局嘅認識,同樣完全都無講任何補充!之後進入揀信技能測試,同樣要將一叠總數大約廿幾封嘅信,由新界、九龍、港岛三區分好,我要邊放邊讀出每封信所寄達地區,再放到檯面寫有三區區名嘅卡片上!

    我將手上所有信放好後,三位面試官一睇全部放啱!再講我已通過是次考驗,而且主席面試官又對我講面試到咗呢刻己結束,如我無問題我可以走得!我為咗做到呢份工,對佢問咗一條有意思嘅問題,果個問題係:如果眞係要凌晨五點鍾開工,公共巴士又未能提供服務點樣算?主席面試官嘅答覆非常詳盡,解答到我問題之餘,更令我對呢份工有更深入嘅了解,佢答完我之後我必定要同你哋講聲唔該先喇!跟住佢都好友善地同我講唔使客氣,不過我都鼓起勇氣同所有面試官簡述我今次帶錯成績表正副本嘅事,慶幸得到佢哋嘅諒解,佢哋話完全唔緊要,因為佢哋會更查番!

     我知道我唔係因為呢樣嘢而無得面試後,我嘅心無咁緊張!希望正如一班面試官所講,我呢個失誤唔會影響到佢哋對我申請呢份工嘅考慮,我喺即將離開呢個面試室果時,好有禮貌地向三位面試官講聲再見,然後攞番我所帶嚟嘅膠袋,我離開座位時佢哋又同我講句再見!關上房門,我嘅心即時輕鬆哂,離開三樓之時,我都同樣向文員亞姐講句再見,佢以點頭回應!我希望小小嘅舉動能夠俾人帶一個好印象,最後係想喺暑假時候可以順利俾郵政署聘請,唔似上次咁樣只收一封落選信喇!

      今日下午三點半,班主任戴太上生活技能教育堂,同時將今年嘅上學期成績表派到每位同學嘅手上。班上一共有至少五至六個同學有分別有最少一科至三科考試唔合格,佢哋就好大鑊啦,因呢班人要喺明年再返嚟補讀返上學期唔合格嘅科目,今年係唔可以喺自己所修讀嘅一年制中專證書課程度畢業喇!果班人有D就係唔夠醒目,差D就合格喇!有D就眞係擺明玩嘢,同老師作對!上課遲到、功課唔交、課堂上唔係扒喺張枱瞓覺就係打NDS,你考試唔合格都唔得啦!

     派完成績表後,戴太對全班嘅總體成績唔係太滿意,再加上班內有一大部份衰仔、衰女唔係返學遲到就係上課遲到,佢就梗係大發雷霆,開聲大鬧班中大部分壞同學,更當場警誡某D即將轉壞嘅同學,令到全班整個上堂氣氛緊張哂!我連呼吸都非常小心,亦都唔敢出一句聲!我只敢低頭望住自己剛才喺佢手上收到嘅成績表,對眼逐項逐項科目去睇!幸好,我自己所有科目及格,有D科目係考得非常好,我今次非常滿意自己喺呢次考試嘅成績,只期望某幾科喺下學期有一D進步,將自己嘅全年嘅平均分維持喺六十五至七十分,確保自己成功穩奪一個基礎文憑嘅學位!

     寫咗咁多,都喺時候同大家公佈一下我喺上學期考試各科嘅成績!第一科係英文及傳意科有85分,第二科係中文傳意及普通話科有67分,第三科係數學科有63分,第四科係資訊科技科有53分,第五科係生活技能教育科有66分,第六科商業實務科係有76分,第七科商務文書處理科係有74分,第八科商業軟件應用科係有62分。我都向大家公佈完所有科目嘅成績啦,當然係有好有唔好啦,其實我要讀九科嘅,第九科係體育科,呢科要全年計算,而且并無分數,只有等級!等級分為三個,第一個係M(優良);第二個係P(及格);第三個係F(不合格)。呢科成績將喺下學期成績表顯示出嚟!我梗係希望體育科都能夠攞個優良等級,咁樣令到我嘅下學期成績表完美一D!

     現時我所就讀嘅職訓局靑年學院不論蘇屋分校或者其他四間分校都係大專院校,雖然果間學院大部份都係開辦中專課程,但也有一部份學校開辦基礎文憑課程!因此係以大專院校模式管理,我哋每個修讀唔同程度課程嘅學生除咗考試成績係要每科有評分或給予等級外,更會仿照大學學分制度,每科仲有學分給予,唔同科目有唔同學分,學分之給予乃根據所修讀嘅課程所有需要修讀嘅科目每科喺一星期之中佔咗幾多個小時而定!例如:數學科佔一星期六中嘅兩個小時,咁樣呢科就係兩學分!只要自己喺上學期考試每科考試及格,自己就會得到所有科目嘅全部學分!

     一年制中專證書專修班(商業)嘅上學期考試所有科目嘅所獲學分共有23分,每個可以喺上學期考試全部科目都合格嘅同學都可以獲得呢個學分,再加上下學期考試裡面所有科目都能考試及格,同樣攞埋下學期所有科目嘅所獲學分,達到青年學院取得最低學分嘅要求,咁樣就可以升班啦!學分制度嘅用途係將一班明年能否升班嘅同學仔做一個分類,可以升班嘅明年順利升班,不能升班嘅就明年再一次重讀唔合格嘅科目直至合格先升到班!上學期要攞嘅學分我梗係全部攞哂啦,因我全部科目都合格嘛!我只期望我能順利將下學期嘅學分全數攞盡,一D都唔好回贈俾青年學院同埋所有同埋一間院校讀書嘅同學仔!我係咁自私咖喇,你哋唔好過嚟搶我嘅學分,唔係我眞係同你搏過咖!

      自從上兩星期開始,每逢星期四下午嘅生活技能教育堂,班主任都圍繞住我哋全班同學嘅一生前途,特别係喺決定我哋每個同學升學或就業方面,佢都為我哋每個同學做呢一方面嘅輔導!現時,由三月中至四月十二號,都喺職業訓練局申請報讀所有專教院、青年學院以及即將新開設嘅香港知專設計學院嘅基礎文憑至高級文憑等課程嘅申請入讀課程嘅期限。其中,提供俾中七預科生報讀嘅一年制、兩年制高級文憑己於二月尾時己經截止報名,眞係快到無人相信!

      好彩我自已無咁醒,我呢個人係重讀咗一年中四之後,成績差到都唔能夠喺原校升讀中五,又無資格考會考,咁樣未去到職業訓練局蘇屋青年學院讀職訓課程囉!好似我呢類學生,如果一早喺職訓局讀書,我哋喺自已所修讀嘅課程達到學校指定嘅等級或分數,就會得到職業訓練局嘅優先取錄計劃比街外嘅會考生早咗一步收咗先!咁樣確保我哋有得明年升讀程度較高嘅課程,以我讀完一年制中專證書專修班為例,畢業考試成績全科及格嘅話就可讀適合我嘅較高程度課程!

     當我完成一年制中專證書專修班呢個課程後,我就要為自己未來一年嘅路作出一個計劃喇!如能喺今年五月尾考完中專證書所有科目,并且每科都能及格嘅話,我就可以攞属於我嘅中專證書啦!我已考取中五程度嘅資歷,可以從事初級文員或者辦公室助理等初級職位!如果我能考取所有科目之平均分都有65分,包括中、英數三科都有65分或以上嘅,我已經符合升讀基礎文憑嘅入學要求,坐底己擁有一個基礎文憑嘅學位!讀完之後,我再擁有中學會考五科及格,包括中英文及格嘅資歷!到時有更加多工作或行業俾我選擇,包括人工同埋福利都太好嘅政府公務員工作

     我諗咗好耐,我今年讀完呢個中專證書,出嚟社會做嘢都唔知可唔可以搵到六千蚊一個月!再者,我會諗住讀埋呢一年先!雖然基礎文憑我努力埋下學期就完全得到我嘅成果,但每年報讀呢個課程嘅會考生係非常多嘅!果班人喺申請時全部都最少有中學會考中、英两科成績,有D更加有五科及格甚至喺該年會考考取接近升讀預科嘅成績!我無一D居安思危嘅感覺都唔得喇,果班人一旦讀咗我想讀嘅課程嘅話,你叫我點樣算?我出年仲使去讀書嘅,我要為我自己努力奮鬥!

     再者,班裡面都有唔少比我厲害嘅同學,仲有隔離電腦班嘅契弟,再加上青年學院與專教院嘅兩年制中專證書二年班畢業生,跟佢哋以VTC內部優先取錄眞係有點兒吃力,但我唔會放棄兼搏盡所有精神去搶呢個基礎文憑嘅學位!特別係我自己最喜歡報讀嘅商業服務分流課程,我更唔會咁容易俾人喺我手中搶去我所要嘅嘢!我好記得有個SINABLOG BLOG友問,點解我唔報讀毅進計劃呢?答案我簡單,毅進一年最少要二萬六千蚊,VTC嘅基礎文憑今年都係一萬六千一百蚊,大家讀完都係有中學會考五科及格包括中、英文及格嘅學歷,可惜前者比後者貴得多!

    班主任戴太教我哋,千祈咪只報一個基礎文憑!否則出現某D原因而不被呢個課程取錄,出年就完全無得讀!因此,佢叫我哋全班同學多報一個適合中五程度嘅課程!我以防萬一,我都同時報咗一年全日制中專文憑精修課程。呢個課程一共分為三個學期,學費與基礎文憑相同。我喺填中專文憑精修課程報名表時,我都報咗商業班!唔好問我點解,因我將來我一旦做唔成消防員,我就一世做文職,安安份份靠份人工養活我亞媽、自己就算喇!但我相信,我能順利升上基礎文憑嘅!呢個課程,我都係用作后備,如非基礎文憑唔收我,我都唔會去讀嘅!如我有咩嘢消息,我一定會同所有BLOG友講咖,大家一於留意一吓啦!

      上星期四嘅下午二點半,我獨自一人乘搭港鐵由長沙灣站去到灣仔站,好唔容易先喺比較擠迫嘅環境之下走出車廂嚟到灣仔地鐵站,然後再行超過三十步,先到一條望上去指示係出口嘅行人扶手電梯,呢條電梯好長,我為咗可以快D去到出口,一於喺扶手電梯上急步上去!上到去之後,我都喘哂氣,嚟到閘機前面,立即用自己右手喺右邊嘅衫袋攞出錢包,再喺閘機前面嘅八達通機接收器一嘟,我右手捉住錢包,左手推開條攔住我嘅鐵條,我終於出咗地鐵站付款區域啦!

      走到A出口,原來都發現有好幾個,A3出口好似係直接到會展,但係我首要係搵灣仔站嘅恆生銀行,我要喺果個地方集合,等到戴太嚟到呢度點名!喺等老師期間,收到班中好友維特嘅電話,佢喺電話度同我講,佢同堅尼因佢哋所在嘅地方距離我哋嘅集合地點太遠,行先全班同學一步,兩人率先去到展覽館五號館等待我哋全班!叫我幫佢哋喺班主任戴太嚟到時點埋名,我回覆佢哋話OK,喺通話當中,有D同班同學比我遲少少,但佢哋見到我都同我say Hi,我都唔可以即時作出反映呢!我喺同維特傾完電話,收咗線之後,我再逐一同佢哋講句Hello!費事俾人覺得我無禮貌!

      班主任戴太嚟到後,見到班中大部份嚟到現場嘅同學都分成幾個小圈子喺度吹水,又有一小部份同學又未嚟到,戴太唯有叫己經嚟到嘅同學仔點咗名先,我本人又企喺戴太附近,佢叫我叫哂企喺恆生銀行門口前唔同方向嘅同班同學嚟到佢企嘅位置前面逐一點名!幸好所有同學都肯合作,聽到我提示後即刻嚟到戴太附近,點名程序都算順利舉行,不過喺就嚟完時,己有不到全班一半嘅同學嚟到兼點埋名,說時遲那時快,突然有七個非常幸運地趕到,戴太當然點埋佢哋嘅名啦!佢哋嘅出現令到全班以五人缺席嘅紀錄為所有其他有份參加是次活動班別嘅模範!

     我哋所有人喺班主任戴太帶領之下,一齊搭扶手電梯上天橋,向着入境事務處大樓方向走,入到大樓裡面,再經幾條特定嘅通道,終於嚟到會展中心嘅地下,再由地下站崗嘅幾個保安亞叔指示,由地下右邊嘅扶手電梯直上三樓五號展覽廳,我哋去到展覽廳門口,我就見到維特與堅尼喺度等全部同學,但我見到佢哋後,我才敢透一大口氣!因我同戴太講,佢哋兩人早全班一步到達,我簡直幫佢哋作擔保,一旦佢唔出現,戴太肯定怪罪於我,到時連我人格都有問題!佢哋兩人歸隊後,全班再點多次名,然後我哋先進入展覽館,入去之前,戴太提醒我哋,一個鐘頭之後再點多一次名!

     我哋一入到去,展覽館門口對正就係職業訓練局嘅展覽攤位,我仲見到其中有喺呢個攤位幫手嘅亞SIR係職訓局青年學院(蘇屋)嘅老師,與職訓局展覽攤位左則嘅係理工大學專業進修學院嘅展覽攤位,周圍附近又有港大SPACE,中大校外專業進修學院等提供副學士課程嘅大專院校眞係睇佢哋嘅院校校名標誌都睇到眼花!仲有好多各間唔同院校嘅職員,非常熱情地俾D唔同嘅課程資料俾你,根本都無問你本人有無最低報讀副學士嘅學歷!我唔想收到太多對我毫無用處嘅宣傳品,因此我立即走到職業展區果度,睇吓來年有邊一行係最好搵!洞悉未來嘅職業路向!

      當我嚟到職業展區後,發覺參展嘅大多數都係政府部門,特別以紀律部隊為多!警務處、消防處、懲教署、入境處加埋海關,總共五個紀律部隊部門有擺攤位作展覽,今年唯有政府飛行服務隊無擺檔!廉政公署都第二年嚟擺檔參展喇,我都唔明佢哋今年請三級空勤主任,為何唔喺今年繼續參展呢?要俾多D有份嚟今年教育及職業博覽展嘅年青人對呢個政府部門有一定嘅認識至得嘛!其次,我見到招職有擺檔,Job Market更喺展覽現場免費派發!有D本港大型嘅地產代理、保險代理等公司都有做展覽,想招攬今年將要工作嘅年青人加入佢哋嘅行業,令到行業有發展!

        我呢份人肯定有我想搵嘅工作,我最想實踐我由細到大嘅志願,係做一個喺火場裡面英勇滅火救人嘅消防員,好可惜我連應徵消防員嘅最低學歷,中學會考中、英兩科及格嘅資格都無!我就即刻去消防處攤位問一D當值中的消防隊長,果個高級消防隊長話我知,依家點都要中五會考中、英兩科及格,或者毅進計劃又或與中學會考同等學歷.佢甚至同我講,所有紀律部隊嘅員佐級職位都要以上嘅學歷先得!如果我係無呢個學歷,建議我盡自己最大嘅能力以獲取消防員嘅學歷!

        我聽到之後,個心好灰!我唯一嘅希望係明年升讀嘅基礎文憑,呢張證書嘅資歷己獲學術評審局評定為擁有中學會考包括中、英兩科及格嘅資歷,有助升學與就業!我第二份想做嘅工係廉政公署執行處助理調查主任,因我由細到大,不論喺大陸生活,抑或現時己移居香港生活,我都喺無線電視睇<廉政行動>這套電視劇集系列,呢套劇話哂係TVB與ICAC嘅合作劇集,劇集內容全部以廉署執行處所調查完結嘅眞實案例改編,我睇完之後,我好崇拜廉署嘅調查員,我好想加入廉署成為佢哋嘅一分子,為香港社會嘅廉潔貢献自己嘅力量!我去到廉署展覽攤位請教咗一個我依家唔記得咗佢個名嘅署理總調查主任,我將我嘅就業意向同佢分享,佢見我有對ICAC咁有熱誠想加入,又對我依家無任何一間正規學校收我讀中五,於是教咗我一個辦法,去區議員辦事處寫推薦書!

         我諗我自己喺今年完成個中專證書課程後,一於有佢教我嘅方法試吓,盡量搵一間正規日校,如果唔得嘅,就返去IVE或YC讀基礎文憑,攞番個跟中學會考同等學歷嘅資歷,實現我呢一生最偉大嘅理想!果日嘅晚上六點半,我才依依不捨地離開展覽會場,走出會展中心,乘搭港鐵歸家去!

      星期三上午,一返到青年學院要上兩堂英文課,第一堂主要講英文文法,講咗兩頁半左右,話咁快就過咗五十分鐘,MISS CHAN突然話TAKE BREAK十分鐘,佢講完之後,又同我哋全班同學講,我要出去返去自己嘅辦公室,攞番全班同學都想知道嘅職業英語考試閱讀部份嘅成績,呢個考試結果,我同所有人等咗一個半月有多!今日嘅呢個時刻,己經等咗好耐啦,我感覺異常興奮!原因有二,一:我終於可以知道呢次考試嘅成績;二:我想俾其他睇唔起我嘅人我係勁過你嘅!

     班上都好有多唔抵得我上堂勤力過其他人兼睇唔過眼嘅同學,都襯Miss Chan返到嚟班房,坐返低喺自己嘅教師位,攞出一張有關我哋班所有同學關於是次嘅成績表,特登借有問題要問佢嘅屎橋,去到佢嘅位置,就用自己嘅"射哩"眼尻住果份成績表!目的係想睇我有幾多分!!!有D仆街甚至一邊行出嚟一邊大聲講,我要睇班長(班裡面一群仆街幫我改嘅花名),究竟佢嘅分數有幾多分先!Miss Chan知道後都唔蠢,即時將一班仆街仔趕走,我睇到呢個情景之後,我掩口笑出嚟!

      之後,Miss Chan話按照學號先後排隊,一個跟一個睇返自己嘅成績,想去厠所嘅就要喺佢前面位置走出班房!果班仆街仔終於無得玩嘢,個個坐返喺自己個位,其他同學仔就一個跟一個出嚟,睇番属於自己嘅成績!喺亞Yan未出嚟之前,佢提醒班中所有同學,如果想抄低自己今次嘅考試成績,各位就要攞張紙將自己嘅成績抄低喇!亞Yan即時咁樣照住做,其他人包括我自己即時跟風,每個人都即時搵張紙,Miss Chan就講,呢個成績係可以在上學期成績表度顯示出嚟!

      有好多同學仔都出咗嚟抄低咗自己嘅考試成績,終於到我喇!我睇返自己嘅分數後,我覺得有D失望!因我好想喺今次攞個1A佳績,可惜試卷第一部分考得唔好,然而第二部份則考得幾好,所以令到總體成績得1B!其實PartA and PartB都各得1B嘅成績,Miss Chan話我自己今次嘅整體考試成績属於1B級以上,差少少就達到攞1A嘅等級!仲同我講,以一百分為滿分,我所得嘅分數係83分!無論佢點樣講,我都對自己今次所攞嘅成績非常失望!自己係唔應該攞咁嘅成績!

      唯有等到考寫作部份嘅時候,自己搏D、努力D去溫書啦!呢個考試喺三月十一日就考喇,我好想喺呢次眞係可以考個1A返嚟,好想俾果班死仆街知道,我係叻過你哋呢班廢物!

      大年初三,俗稱赤口日,傳統上都唔適合拜年,但信耶穌嘅我完全無懼呢D傳統.我同一班有三人組成嘅昭偉小組拜年團去到平日負睇住我哋嘅教牧亞華屋企拜年,今年係佢喺第一年結婚後,佢請我哋去佢嘅新居參觀,順便拜年嘅日子!我當然着得好姿整咁樣去佢屋企喇,費時搞到自己失禮呀!如果搞到咁嘅地步,我漢仔以後仲使喺教會同埋牧區行嘅!我唔着得姿整我寧願唔去!

     我同組員一早約好兩點正喺黃大仙地鐵站恆生銀行門外等,我準時嚟到,但一個相熟嘅人都見唔到!我企喺度等咗無幾耐,愷欣第一個嚟到,見到穿着新衫嘅佢有平日一般嘅美表現俾我睇!但佢見到我後第一句就同我講:「昭偉喺邊度?」乜唔係喺新年日子見面後要講祝福說話咩!我就答佢,昭偉仲未嚟,我哋一於企喺原位等佢,當然一路等一路傾計喇!唔係咁等會好悶咖!

     我哋兩個等咗昭偉十分鐘,終於見佢出閘!愷欣第一個上前打佢,我則怪佢,你身為組長,唔以身作則,居然夠膽遲到!佢當然要向在場等得咁辛苦嘅我哋作當面解釋,但佢解釋完後,立即番舊賬,力數我有幾次喺舊組遲到嘅紀錄,咁樣用嚟做呢次活動嘅遲到藉口,我覺得佢認眞狗!

     同佢對鬧一輪後,我再唔跟佢鬧落去,我怕警察會誤會我同佢有一D爭執拉我!之後,佢先記起自己無打電話俾亞芝,即刻打俾佢果時,到同亞芝手提接通咗,亞芝即刻話佢喺大陸,依家用緊漫游,唔可以去亞華屋企拜年,又話電話費貴講多句拜拜後就收線喇!亞芝一收線後,佢就一臉無奈!愷欣問佢點樣,佢照答出嚟,亞芝己身在大陸,唔可以與我哋同行,佢又俾愷欣打咗一身!

    等到愷欣打完後,佢又再表示,我又無通知亞Sam,又俾愷欣打多幾下,佢又再打電話俾Sam,通知佢我哋去亞華屋企拜年!好彩亞Sam嘅屋全距離黃大仙地鐵站都比較近,我哋講埋亞華屋企點樣去,佢話自己識去,昭偉同佢講完後,收咗線喇!我哋就一於行先一步,去到B出口,出咗地鐵站後,行到去龍翔中心對出嘅巴士車站!搭2X3號巴士去亞華屋企,落車喺佢屋企所住嘅屋苑落!

     喺巴士站等到呢架車,我哋三人一齊上車,我同愷欣一齊嘟八達通,唯有昭偉俾散銀!好喇,車錢己俾咗喇,我有權坐位嘛,點知昭偉話好快就到亞華屋企,一於企吓喎!又點知一企就企足十五分鐘,到落車時,我只脚軟到差D行唔到!落車後,寒風刺骨兼脚軟,我都行到有D唔想行!最終喺行吓、抖吓嘅情形下,去到亞華屋企所在樓宇嘅地下,昭偉唔能透過通話系統通知亞華,只能靠保安開門!我哋入去之後,同保安亞叔講,我哋入去1x3x室度探朋友,完全唔需要記底個人資料,亞叔就咁放行,我哋搭升降機上去亞華屋企,直到去到佢屋企門口都好順利!完全唔見一個街坊!

     我哋去到亞華屋企後,昭偉按咗幾下門鍾,亞華出嚟開門,當佢一門以及鐵閘,一陣好虛撼嘅聲音己喺我哋三人嘅雙耳過度震盪!我哋入屋一睇,一班為數十八人嘅華區區員己一早嚟到亞華屋企,屋内有幾個平時都幾鍾意煮食嘅姐妹喺電磁爐旁負責煎蘿白糕俾其他區員食!我則頭先由搭巴士途中直至行去亞華屋企都好急尿,死忍忍咗都幾耐,終於可以喺佢屋企嘅厠所解決!當我解決完後,我沖咗厠啦,洗埋隻手,發覺亞華屋企嘅厠所都好靚,唯一欠佳嘅就係比我屋企細D!

     我出嚟厠所後,亞華即刻遞上一盤蘿白糕同一對筷子,叫我食多幾件,可惜蘿白糕裡面有蝦米,我細細個就食唔到蝦,唔係我都會食一兩件嘅!最後我飲咗兩包黑加輪子汁,味道得個淡字!即刻同一班弟兄玩英文版嘅大富翁,由亞華做銀行!一班姐妹則玩電視游戲,總之就各有各玩,玩到興高采烈時,門口聽到鍾聲,亞華去開門,我組嘅新朋友亞Sam終於嚟到,我哋全部人拍手歡迎!亞Sam嚟到後,我將由我玩開嘅大富翁游戲讓俾佢玩,我自己則同一班弟兄姐妹傾吓計!

    我的弟兄姐妹也好愛我,佢哋見我未玩過電視遊戲,主動將同我傾緊計嘅弟兄暫時唔再傾住,同我一齊玩這個游戲!我由唔識點樣玩,直到捉摸當中嘅重點,從而搵到當中嘅樂趣,我發覺到,可愛嘅就係一班教會牧區弟兄姐妹!當然,當中有D朋友係好鐘意玩呢類游戲,我都唔會阻住佢哋嘅,我玩咗一陣之後,好快就讓出個位俾有意去玩嘅朋友喇!我再次繼續加入番去與我未玩游戲之前,同我傾緊計中嘅弟兄姐妹圈子裡頭,再繼續分享我哋各人嘅生活加學習方面嘅事情!

    到了接近五點,亞華話我哋今年嘅牧區新年團拜即將結束,我哋即刻幫手收拾好一切,然後再攞番自己嘅私人物品,我見到我哋所有弟兄姐妹食咗佢屋企七底半蘿白糕,剩低半底俾佢老婆食!節目結束即將之時,亞華要派利是,仲要代表佢老婆派埋佢果份,我哋所有人只要向佢講句祝福說話就有得攞,我祝佢新年蒙福!利是攞完後,由於果日都係要照常返教會聚會,但我一早就應承亞媽自己會喺六時前返家,我要同一眾弟兄姐妹分道揚鏢,幸好思敏跟我情況一樣,我哋兩人到樓下嘅小巴站搭小巴到樂富港鐵站再轉搭港鐵返家!今年第一年搞嘅新年團拜眞係令我感到家嘅溫暖!

      我先前都Post舊昭偉小組嘅組員相片,新嘅小組終於喺三個月前開始聚會,依家嘅新組己發展得非常好,年初三時更會首次進行組活動,去到我哋嘅區牧華哥屋企拜年!可能會朝早去,可能會夜晚去,如果我哋搞得成,我完咗呢個活動後,會再寫一篇網誌同大家分享,大家要等待一下!

      全新組合果嘅小組一共有八個人,分別係:本網誌嘅主人---漢仔、組長昭偉、Brain、愷欣、芷恩、亞芝,以及新朋友亞Sam同埋郭莢。我哋每個星期六嘅下午四點半就喺教會十樓有我哋嘅聚會,其實都歡迎一D有興趣認識基督教信仰嘅年青人參加嘅,不過呢D情況唔算多囉!

      當然,我非常希望我哋嘅小組有多D人參加,咁樣可以多D熱鬧嘛!甚至可以向教會申請更多資源,例如有更大嘅房間,面積有如一個接待廳嘅地方,到時我哋嘅聚會似足喺度開大會一樣!仲有多D空間俾我哋玩小組游戲,等我哋開組都盡興一D!大家彼此嘅關係都會親密一D,一家人咁!

      其實我哋小組喺聚會時都唔會開會咁沉悶,我哋嘅聚會係好互動嘅!所有時情節都按教會規定咗嘅程序去做,一D都唔會越軌!首先有Icebreck,透過游戲我哋可以解開有D陌生嘅關係!敬拜,游戲完後要尊注到神果度!分享,透過祈禱我哋可以彼此扶持!更會知道我哋嘅異象,向住目標去行走!雖然我哋八個人一個星期見一次,但己經足夠把我哋嘅關係好緊密咁連結起嚟!

      我對小組嘅期望係:努力做好見證,作榮耀神嘅群體!做一個吸引多D未認識耶穌嘅少年人加入教會,從而,對基督教信仰有更深嘅認識.最後,相信耶穌做佢哋嘅個人救主!終極目標係:可以令到教會人數有每年穩定的增長!到時,呢個情景有得發生嘅話,特別係喺青少年呢個群體發生,係一件相當奇妙嘅事!但我呢個咁傻嘅少年人就係咁樣諗,我內心期待緊呢個場面嘅來臨!